Job 38

1 Evus, Iahova selus min Siop ka en angu tai vit,

2 “?Koa keik sei, komul kovis rendemien keil onak
ral min selusien koa vi heite hon koa meteisauen tovuol ien?
3 !Lomal, munak kovit kovi meahos!
Kihit kes selusien koa mahisuk eni.
4 ?Komul kave navong namumon out netan?
Munak kokilea revi en tounah vasi, kihit usili minau.
5 ?Isei ling kat keite keilu teni?
?Isei kilea taveah teni?
?Keik kokilea?
6 ?Asa vuli kat vatiseng koa vuli kat out netan?
?Isei ling kat vati ahat ten out netan?
7 En avong enek, hitu keil ten menauilan amusau ruai,
ka angelo vasi keil ten out nesa amakul en sien.

8 ?Isei mumon vati vieh val koe atas
navong mue rohtoh ran anev ten atan?
9 Inau nakav koe atas en mahmah
ka nasakin mankoli mul koe.
10 Inau naling hakot en atas
keke sakras vahina vapurun atan.
11 Inau naviteni mini navit, '!Keik kitokol oute ka kosakras kovali!
Tahe takeih keil onom hemavul hehati heles en out enek.'

12 ?Siop, en moulien onom,
keik komeng kat etai avong vamai valan?
13 ?Keik koviteni min meteiai vatitin vaka vasi out netan
keke vasil luvat koakeil asak kalkali ran out aro suai ien?

19 ?Keik kokilea out meneai ka en
vuo mankoli kistal en out kave?
20 ?Keik kokilea kovatie min keilu sise onealu mul kave?
?Vuo kovasila keilu luvaha ris en vulealu?
21 ?Keik kokilea kovoumoni? !Vuo, kosakras!
Veni arvasuktei veah ka sua onom keil rovinvintei.

34 ?Keik kokilea kovamakul vahina min mahmah keil
ka kovasakin ous vakasuk?
35 ?Keik kokilea kovasakin ahil vahil,
ka kei val vatosin mengkatien onom?
36 ?Isei san meteisauen onen min etai meatin,
vuo sakin rendemien onen vaileili?
37 ?Isei vi metaluv vavinvin vahuli mahmah keil?
?Isei kilea vatah lin ous vous
38 vasakin vuli meas vamai out vatas,
ka nehi atan keil ipilit kat keil?”